Harakat xavfsizligi doimiy nazoratda

2026-yil 27-avgust kuni “Qarshi mintaqaviy temir yo‘l uzeli” filiali boshlig‘i M.X. Mirzayev hamda korxona rahbarlari ishtirokida Qarshi–Oqrabot temir yo‘l uchastkasi bo‘ylab 106-son diagnostika laboratoriya vagoni yordamida monitoring va texnik ko‘rik ishlari amalga oshirildi. Mazkur kuzatuv davomida temir yo‘l izlari, sun’iy inshootlar, signalizatsiya va aloqa qurilmalari, elektr ta’minoti hamda boshqa infratuzilma obyektlarining texnik holati o‘rganilib, aniqlangan kamchiliklarni bartaraf etish yuzasidan tegishli mas’ullarga aniq topshiriqlar berildi. Dehqonobod va Qoradahna stansiyalarida relslarning texnik holati, strelkali o‘tkazgichlar, svetoforlar, elektr ta’minoti qurilmalari, sun’iy inshootlar, ko‘priklar hamda texnik hujjatlarning yuritilish holati batafsil o‘rganildi. O‘rganishlar davomida aniqlangan kamchiliklarni qisqa muddatlarda bartaraf etish, temir yo‘l infratuzilmasini soz holatda saqlash hamda poyezdlar harakati xavfsizligini ta’minlash yuzasidan filial rahbari M.X. Mirzayev tomonidan mas’ul rahbar va mutaxassislarga aniq topshiriq hamda ko‘rsatmalar berildi.