Bahorgi ko'rik davom etmoqda

"O‘zbekiston temir yo‘llari" AJ boshqaruv raisining tegishli buyrug‘iga asosan, "O‘zbekiston temir yo‘llari" AJ hamda “Temiryo‘linfratuzilma” AJ rahbariyati boshchiligidagi komissiya a’zolari tomonidan “Temiryo‘linfratuzilma” AJning "Qarshi mintaqaviy temir yo‘l uzeli" filialiga qarashli korxona, tashkilot hamda stansiyalarda bahorgi ko‘rik o‘tkazildi. Ko‘rik davomida xo‘jaliklar holati, mehnat intizomiga rioya qilinishi, inshoot va qurilmalarning soz holatda saqlanishi, ish texnologiyasining to‘g‘ri bajarilishi hamda mehnat muhofazasini ta’minlash bo‘yicha olib borilayotgan ishlar atroflicha o‘rganildi. Shuningdek, harakat xavfsizligi talablarining bajarilishi, profilaktik ishlarning olib borilishi, lokomotiv, vagon, yo‘l, elektr ta’minoti, signallashtirish va aloqa xo‘jaliklaridagi mavjud kamchiliklarni aniqlash hamda ularni bartaraf etish masalalariga alohida e’tibor qaratildi. Mazkur bahorgi ko‘rik "Kengsoy – Qarshi" temir yo‘l uchastkasida joylashgan stansiyalarda, "Qarshi ta'mirlash masofasi" filiali, "214-sonli Yo'l mashina stansiyasi" filiali, "Qashqadaryo ta'mirlash masofasi" filiali, "Qarshi elektr ta'minoti masofasi" filiali, "Qarshi vagon ekspluatatsiyasi uchastkasi" filiali, "Qarshi signallashtirish va aloqa masofasi" filiali va "Qarshi lokomotiv deposi" filialida tashkil etildi.